بە خەندەی زۆری من دێوانە ئەگری - بێخود

له‌لایه‌ن: - ڕێزدار ئەحمەد ڕێزدار ئەحمەد - به‌روار: 2022-05-23-01:57:00 - کۆدی بابەت: 8757
بە خەندەی زۆری من دێوانە ئەگری - بێخود

ناوه‌ڕۆك

بە خەندەی زۆری من دێوانە ئەگری

شاعیر: بێخود

بەرهەم: دیوانی بێخود

ناوی شعر: بە خەندەی زۆری من دێوانە ئەگری

بە خەندەی زۆری من دێوانە ئەگری

بە گریانی کەمم فەرزانە ئەگری

بە تاریکی دەروونم گەر بزانی

هەتا ڕۆژ وەک چرا پەروانە ئەگری

لە بێ شیری ویساڵی یارە، شەو، دڵ

لە بێشکەی سینەدا تیفلانە ئەگری

دوو دیدەی نێرگسینی پڕ لە لالەم

لە دەوری لێوی ئەو چاوجوانە ئەگری

لە نەشئەی پێکەنینی ساقی ئیمشەو

لە بەزما پیری من مەستانە ئەگری

شتێکت دیوە ئەی دڵ هەر لە مەجنوون

کە ڕێی ئەو بێ سەر و سامانە ئەگری

وەسیلەی گەینە شارت کێیە بێخود

کە چەشنی حەڵقە بەردەرگانە ئەگری


سەرچاوەکان



303 بینین