ناوه‌ڕۆك
گۆرانیی سەرچنار
شاعیر: بەختیار زێوەر
بەرهەم: دیوانی بەختیار زێوەر
هۆنراوە: گۆرانیی سەرچنار
ئاوەکەی سەرچنار
چاوگەکەی نیشتمان
لای منی دەردەدار
تۆی شیفابەخشی گیان
***
یەک دڵۆپ ئاوی تۆ
گەر بگاتە دەمم
لائەبا بێ درۆ
دەستبەجێ گشت غەمم
***
سەیر ئەکەم پڕ بەهەشت
خاوەنی چیمەنی
بۆیە هەروەک بەهەشت
گوڵشەنی دیمەنی
***
ئاوەکەی سەرچنار
کەوسەری سەرزەمین
تۆ دەسی کردگار
پێتی بەخشیوە ژین
***
هەڵقوڵە هەر بە جۆش
ڕێڕەوت گەوهەرە
ئاوی پیرۆز و خۆش
لوتفی خوات لەسەرە
***
تۆم هەبی پاک و ڕوون
جێگە سەیرانی عام
بۆ تەواوی دەروون
ناچمە لوبنان و شام
***
ئەودەمەی جار بە جار
دێمە سەیران لەلات
بانگ ئەکەم پڕ بە زار
گەییمە ئاوی حەیات
سەرچاوەکان
267 بینین
