عەلی زەیدی (سەرۆک وەزیرانی ڕاسپێردراو)
عەلی فالح کازم ئەلزەیدی، ناسراو بە عەلی زەیدی، بانکەوان، بازرگان و سیاسەتوانێکی عێراقییە. لە 27ی نیسانی 2026، وەک کاندیدی تەوافوقی لە لایەن چوارچێوەی هەماهەنگییەوە بۆ پۆستی سەرۆک وەزیرانی عێراق دەستنیشان کرا و لە لایەن سەرۆک کۆمار نزار ئامیدییەوە ئەرکی پێکهێنانی حکوومەتی نوێی عێراقی پێ سپێردرا.
ژیان و پێگەی زانستی
عەلی زەیدی لە ساڵی 1986 لە شاری بەغدا لەدایکبووە. خاوەنی بڕوانامەی بەکالۆریۆسە لە هەردوو بواری یاسا و دارایی، هەروەها بڕوانامەی ماستەری لە دارایی و بانکەوانیدا بەدەست هێناوە. ئەو ئەندامی کارای سەندیکای پارێزەرانی عێراقە و وەک کەسایەتییەکی شارەزا لە بواری کارگێڕی و دارایی دەناسرێت.
ژیانی بازرگانی و کارگێڕی
پێش چوونە ناو کایەی سیاسی، زەیدی یەکێک بووە لە بازرگانە چالاکەکانی کەرتی تایبەت. ئەو سەرۆکی گرووپی (وەتەنییە هۆڵدینگ) و گرووپی (ئەلعووەیسە)یە کە 15 کۆمپانیای جیاواز لە بوارەکانی خۆراک، کشتوکاڵ، بەڵێندەرایەتی و نەوت لەخۆ دەگرێت. هەروەها سەرۆکایەتی ئەنجومەنی کارگێڕی لە زانکۆی شەعب و پەیمانگای عەشتار دەکات و خاوەنی کەناڵی ئاسمانی دیجلە و زنجیرە مارکێتەکانی تەعاوونە لە بەغدا. لە کەرتی گشتیدا، سەرپەرشتیاری سیستەمی کارتی بەشەخۆراکی نیشتمانی بووە لە وەزارەتی بازرگانی.
وێستگەی سیاسی و سەرۆکایەتی وەزیران
دەستنیشانکردنی عەلی زەیدی وەک سەرۆک وەزیرانی ڕاسپێردراو دوای چەندین هەفتە لە چەقبەستوویی سیاسی لە ناو چوارچێوەی هەماهەنگی هات. پاڵاوتنی ئەو وەک کاندیدێکی سەربەخۆ و "نوێهاتوو لە سیاسەت" ڕێگەی خۆش کرد بۆ ڕێککەوتنی نێوان لایەنە ناکۆکەکان. زەیدی لە یەکەم لێدوانی گشتیدا ڕایگەیاند کە کار بۆ باشترکردنی خزمەتگوزارییە کۆمەڵایەتییەکان و پاراستنی پەیوەندییە دیپلۆماسییە هاوسەنگەکان لەسەر ئاستی ناوچەیی و نێودەوڵەتی دەکات. بەپێی دەستوور، ناوبراو 30 ڕۆژی لەبەردەمدایە بۆ ناساندنی کابینەکەی بە پەرلەمانی عێراق.
