ناوه‌ڕۆك
ناساندن
ڕێگاکانی وانەبێژی (بە ئینگلیزی: Lecture Method، بە عەرەبی: طرق القاء المحاضرة)، لەم ڕێگایەدا مامۆستا تێدا ڕۆڵی ناوەندی دەگێڕێت و فێرخواز تەنها دەبێتە گوێگر، مامۆستا ڕۆڵێکی ئەرێنی دەگێڕێت و لە بەرانبەردا فێرخواز ڕۆڵێکی نەرێنی ئەمەش وا لە خوێندکار دەکات کە کەمترین زانیاری بیر بمێنێت.
خاڵە لاوازەکانی ڕێگای وانەبێژی
١- زۆرترین زانیاری بۆ قوتابی باس دەکرێت و کەمترین بەشداری پێ دەکرێت.
٢- قوتابی ناتوانێت بۆ ماوەیەکی زۆر سەرنج بدات.
٣- ناتوانرێت ڕەچاوی جیاوازی تاکایەتی نێوان قوتابیان بکرێت.
٤- مامۆستا بەکارهێنانی نمایش و گۆڕانکاریکردن بە دەنگی بە بەردەوام پێویستە.
٥- قوتابی کەمترین باس و زانیاری بیر دەمێنێت بە ڕێژەی لە ٢٠٪.
٦- لەوانەیە مامۆستا دوور بکەوێتەوە لە تێگەیشتنی قوتابی.
٧- زۆرجار لەسەر چەندێتی زانیارییەکان مامۆستا قوتابیەکانی هەڵدەسنگێنێت.
خاڵە بەسوودەکانی ڕێگای وانەبێژی
١- پاشەکەوتی مامۆستا لە ماندوێتی.
٢- دەتوانرێت بابەتێکی بەرفراوان لە کاتێکی کەمدا پێشکەش بکرێت.
٣- دەتوانرێت زۆرترین زانیاری پێشکەش بە خوێندکاران بکرێت.
ئەو هۆکارانەی وادەکەن مامۆستا ڕێگای وانەبێژی بەکاربهێنیت
١- زۆری پڕۆگرامی خوێندن.
٢- لێپرسینەوەی سەرپەرشتیار لەگەڵ مامۆستا.
٣- دواکەوتنی پەرتووک و پڕۆگرامەکانی خوێندن.
٤- گواستنەوەی مامۆستا لە نێو ساڵی خوێندندا.
٥- ئاسانی ئەم ڕێگایە بە بەراورد بە ڕێگاکانی تر.
٦- سیستەمی تاقیکردنەوەی باو کە پشت بە چەندێتی زانیاری دەبەستێت.
٧- شارەزا نەبوونی مامۆستا لە ڕێگاکانی تری وانەوتنەوە.
٨- زۆری ژمارەی خوێندکاران لە نێو پۆلی خوێندندا، هاوکات زۆری ژمارەی پۆل و بەشە وانەکان.
٩- ڕاهاتنی مامۆستایان لەسەر شێوازی زانکۆیی کە بە وانەبێژی وانەیان پێ خوێندراوە.
ئەو ڕێنماییانەی پێویستە مامۆستا بیگرێتەوە بەر
١- پاڵپشتیکردنی وانەکە بە ئامڕازی فێرکاری و بەکارهێنانی.
٢- هاندانی قوتابیان بۆ پرسیارکردن و گفتوگۆکردن.
٣- دابەشکردن و دانانی پلانێکی ڕێکخراو بۆ وتنەوەی بابەت.
٤- بەکارهێنانی جووڵەی دەنگ و نمایشی پێویست.
٥- کۆتایی هێنانی وانەکە بە کورتە و ئەنجام بە دەستەوەدان.
لە ڕاستیدا ئەو ڕەخنانەی کە ئاڕاستەی ئەم ڕێگایە کراوە واتای ئەوە نییە کە پشتگوێ بخرێت و کاری پێ نەکرێت، بەڵکو وەک پەروەردکاران ئاماژەی پێ دەکەن لە نێو ڕێگاکانی تریش مامۆستا ناچار دەبێت بەکاریبهێنێت و لەم کاتانەی خوارەوەش بەکاردێت:
- پێشەکی: ئەم ڕێگایە لە کاتی پێشەکیدا بۆ ئامادەکردنی بیری قوتابی و ورووژاندنی پاڵنەرەکانی و سەرنج ڕاکێشانی بۆ بابەتێکی نوێ بەکاردێت.
- خستنەڕوو: مامۆستا ئەم ڕێگایە لە کاتی خستنەڕووی ناوەڕۆکی بابەت بەکاردەهێنێت بۆ ڕوونکردنەوەی هەندێک چەمک و زاراوەی گرنگ.
- هەروەها بۆ باسکردنی هەندێک بەسەرهات و چیرۆک و ڕووداو کە پەیوەندی بە بابەتی فێرکارییەوە هەیە.
