زەردەخەنە لە فرمێسکا - شێرکۆ بێکەس

له‌لایه‌ن: - ئاڵەکۆک - به‌روار: 2021-10-15-04:17:00 - کۆدی بابەت: 6889
زەردەخەنە لە فرمێسکا - شێرکۆ بێکەس

ناوه‌ڕۆك

زەردەخەنە لە فرمێسکا

شاعیر: شێرکۆ بێکەس

بەرهەم: تریفەی هەڵبەست

شیعر: زەردەخەنە لە فرمێسکا

١

گیانە بیستم، کەپرسیبوت چۆنە ئێستا
لەگەڵ ژینا؟ لەگەڵ دانانی هەڵبەستا؟ 

وەک خۆی ماوە، شێوە و ڕەنگی، یان گۆڕاوە؟ 
دەنگی وەک ئەوسا زوڵاڵە یان خنکاوە؟ 

***

وەکو جاران قسەکانی هەر زیندووە؟ 
یان ساردو سڕ وەک دەم و دەسی مردووە؟ 

بەتەرازووی عەقڵی دوێنێ خەڵک سەنگ ئەکا؟ 
بە شوێن هەتاو، یاخود سێبەرا، ڕا ئەکا؟ 

***

وەکو جاران، زۆر گەورە ناو، وا ئەناسێ؟ 
یان ئەو بەرگەی، بیری کۆنی، خۆی.. گۆڕیوە؟ 

بە واتەیان، تەناف بۆ مل، هەڵئەواسێ؟ 
یان زۆر ملی، لەو تەنافە، …. دابڕیوە؟ 

***

توخوا ئێستەش وەکوو جاران دڵی تەڕە؟ 
یان گوڵاڵەی بەهارەکەی هەڵوەریوە؟ 

وەکوو جاران، پێش برسێتیی، لەسەر، سەرە؟ 
یان لەژەنگی ناو کۆمەڵا، دڵ ڕزیوە؟ 

***

وەکوو ئەوسا کە ئەمناسیی.. گیانی گەشە؟ 
یان دەماری، هەستی سڕەو، بەنجی خەوە؟ 

نانی ژینی، نانی سپی، یاخود ڕەشە؟ 
ڕەنجی شانی بۆ ڕووناکیی یان بۆ شەوە؟ 

***

ئەڵێن پشتی، جیڕی دوێنێی، ئەمڕۆ لەژێر
باری قورسی، نەبونیدا، کۆماوەیە؟ 

ئەڵێن دۆستی، زۆری دوێنیی، بۆ چاو بگێڕ
تاک و تەراش لەچاوی ئەو شاراوەیە

***

ئەڵێن ئەمڕۆ، بەدارشەقی، ڕێی بێکەسیی
لاشەی سستی وەکوو پەڕۆی هەڵگرتووە

توخوا ڕاستە مۆمی دڵ و داری دەسی
لەتاریکی شەوی عومریا ون کردووە؟ 

٢

وەرامەکان، لەقەفەزی، سینەی یادا
وەک بولبولی، هیلاکی خەو، کز هەڵنیشتون

پرسیارەکان لەتینوێتی، سەر ڕێگادا
زۆریان لەناوچوون و خنکان، زۆریان مردوون. 

***

گیانە هەرچەند، شیعرم لەناو، تەمی خەما
پەل ئەکوتی، ڕێگەی وونە، بەڵام بۆ تۆ

بەرەو ساماڵ، ڕێگە ئەبڕێ، تەم لائەدا
دەمی وەرام، گەر «گۆ»یش نەکا، بۆت دێتە گۆ. 

***

گیانە ڕاستە ئەم چەند ساڵە دەستی ئازار
دەقی پەڕەی لاوێتیمی ژاکاندووە

چاوی تیری پڕ لەشەوقی پار و پێرار
ئەمڕۆ کزە و جوانیی لەخۆی تۆراندووە! 

***

ڕاستە پەنجەی، ناسۆر لەسەر کێلی بەختم
هەڵبەستێکی چارەنووسی وشکی نووسیی

ڕاستە ڕێگای، بیست و حەوتی، عومری سەختم
بەهارێکی، بەختیاری، تا سەر نەدی

***

بەڵام گیانە، دەنگی ئەمڕۆم، زیاد لەدوێنێ
زوڵاڵ ترە و، بەناو ژیانا، باڵ ئەگرێ

قسەی زیندووم، تا دڵی مردوش ئەدوێنێ
شنەی وشەی تا فرمێسکی ناو چاو ئەسڕێ. 

***

ڕێ وون ئەکەم، خۆم ون ئەکەم، بەڵام گیانە
هەرگیز خۆری سەرفرازیی کورد وون ناکەم

ژیان لای من، بەرەو هیوا، کۆڵ نەدانە
گەر وا نەبێ، بەدڵ خواستی، مردن ئەکەم. 

***

گیانە دوێنێ کە ئەتناسیم وەک مناڵ بووم
گرێی دەستم، ئەخستە ناو، دان و ناو دەم

ئەو سەردەمە، ساوای بیری، گڕ و گاڵ بووم
نەم ئەزانی، ئەڵقەی فرسەت، چۆن لەدەس کەم. 

***

ئەو سەردەمە، ناڵەی برسیم، ئەهاتە گوێ
چاوم ئەکەوت بەفرمێسکی چاوی ئازار

پەلی کوێرم ئەگرت ئەمبرد هەتا سەر ڕێ
ئەشمنوسی بمرێ زستان بژی بەهار! 

***

بەڵام گیانە، ئەوسا منیش، پۆشتە وەک تۆ
لەسەر تێریی، باسی برسێتیم بۆت ئەکرد

قسەی جوانم ئەخستە گیرفانی درۆ
لەژێرەوەش ئاڵای ڕیام پێ هەڵئەکرد. 

***

ڕاستە ئەوسا ژیان وەکوو دڵی ساوا
ئاسمانەکەی، بێگەردبوو، پاک بوو ساماڵ بوو

بەڵام گیانە، ڕێگای مێشکمان لەچاوا
بۆ ڕێبواری، بەنگ کێشی خەو و خەیاڵ بوو. 

***

باوەشی ناز هیوای دڵی ڕائەژەنیم
تاریکەشەو کێوێکی ترسی بەسام بوو

لەکام تەقە، زۆر بچووکە، ڕائەچەنیم
دڵ ناسک و بیر کاڵ و کرچ و نەفام بوو. 

***

ئەسپی خەیاڵ لەژێر لێفەی گەرمی شەوا
بۆکام دنیا ئێجگار دوورە ئەو ئەیبردم

حەزی دەروون، چی بویستایە بۆی ئەلوا
لەگەڵ تۆشا، دەسی پێ لەمل ئەکردم. 

***

بەڵام ئەمڕۆ ئەو ئازارەی من ئەیچێژم
ئازارێکە، بەختیاریی، تیا ئەبینم

ئەو چاوانەی، کە فرمێسکی، پێ ئەڕێژم
چاوێکە تۆوی پیاوەتی تیا ئەچێنم. 

***

لەژیانی تفتی ئەمڕۆی کزر و دێما
سبەینێی تەڕ و پاراوی کورد ئەبینم

لەهەورازی، سەخت و ئارەقی سەر ڕێما
دوائەنجامی سەرفرازی مەرد ئەبینم. 

***

لەهەر ئاخێکی ناو سنگی پڕ لەسوێما! 
هەزار کسپەی جەرگی کۆرپەی کورد ئەبیسم

لەناو هەموو هەنسکێکی قوڕگی خۆما
دەنگی قرچەی، دڵی دار و بەرد ئەبیسم. 

***

ئەو زەوییەی ئەمڕۆ وشکە و گاسنی خەم
ناخی دەروونی، بەدانی، ڕق ئەکێڵێ

ئەو کۆترەی ئەمڕۆ لەبەر باران و تەم
بێچوی هێلانەی ئارامی جێ ئەهێڵێ. 

***

سبەی زەوی، لەهەر بستێکیا کانییەک
وەکوو چاوی، قرژاڵی ڕوون.. هەڵ ئەقوڵێ

هەر کۆترەی بەخوێندنی گۆرانییەک
بەستەی ژیانی ئازادی بۆ گەل ئەڵێ. 

***

بەڵێ گیانە لەتاریکی شەوی ڕەش دا
چاوم خۆری ناو شەبەقی ژین ئەبینێ

لەگریانی ناو ئازاری زامی لەش دا
ئومێد، دیاریی، پێکەنینم، بۆ ئەهێنێ

***

لەپایزی لێوی وشکا لەخەزانا
زەردەخەنەی بەهاری دڵ ئەبینم من

لەباوەشی بەفر و زوقما، لەزستانا
چەپکە نێرگز، یاخود نەورۆز، ئەبینم من. 

***

لەناو هەر قەترە خوێنێکی لێ ڕژاوما
گوڵی باخچەی ئازادییەک ئەبینم من

لەهەر گوڵە گەنمێکی لێ سووتاوما
سبەی خەرمانی شادییەک ئەبینم من.


سەرچاوەکان



292 بینین