ناوه‌ڕۆك
ناساندن
لوکاس ڤازکێز (بە ئینگلیزی: Lucas Vazquez، بە عەرەبی، لوكاس فاسكيز). یاریزانێکی پیشەگەری باڵی ڕاستی بەرگری و هێرشبردنە لە یانەی ڕیاڵ مەدرید و هەڵبژاردەی ئیسپانیا. لە ١\٧\١٩٩١ لە شاری کورتسی ئیسپانیا لەدایکبووە.
زانیاری گشتی
| ناوی تەواوەتی | لوکاس ڤازکێز |
| ناوی کورتکراوە | ڤازکێز |
| بەرواری لەدایکبوون | ١\٧\١٩٩١ |
| شوێنی لەدایکبوون | کورتس، ئیسپانیا |
| باڵا | ١٧٣ سانتیمەتر |
| شوێنی یاریکردن | باڵی ڕاستی بەرگریکردن و هێرشبردن |
مێژووی یاریکردن لەگەڵ یانە
بەپێی ئەوەی ڤازکێز لە کورتس لەدایکبووە لە ساڵی ٢٠٠٧ و کاتێک تەمەنی ٦ ساڵان بوو پەیوەندی بە یانەی منداڵانی ڕیاڵ مەدرید کرد. لە وەرزی ٢٠١٠ - ٢٠١١ یەکەم یاری خۆی بۆ تیمی ڕیاڵ مەدریدی ژمارە ٣ ئەنجامدا.
لە ١٩\٨\٢٠١٤ بە گرێبەستێکی ١ ساڵی پەیوەندی بە یانەی ئیسپانیۆلی ئیسپانییەوە کرد و لە ٣٠\٨\٢٠١٤ یەکەم یاری لە خوولی ژمارەی یەکی ئیسپانی (لالیگا) ئەنجامدا. لە ٥\١٠\٢٠١٤ یەکەم گۆڵی خۆی لە وەرزی لالیگادا تۆمارکرد. لە ٣\٦\٢٠١٥ گرێبەستێکی ٤ ساڵی لەگەڵ یانەی ئیسپانیۆلدا بەست.
لە ٣٠\٦\٢٠١٥ گرێبەستەکەی لەگەڵ یانەی ئیسپانیۆلدا هەڵوەشاندەوە و دووبارە گەڕایەوە مەدرید. لە ١٢\٩\٢٠١٥ یەکەم یاری خۆی لەگەڵ یانەکەدا ئەنجامدا. لە ٢٦\١٠\٢٠١٦ گرێبەستەکەی تا ساڵی ٢٠٢١ درێژکردەوە. لە وەرزی ٢٠١٦ - ٢٠١٧ بەژداری ٣٣ یاری کردووە و دوو گۆڵی تۆمارکردووە. لە وەرزی ٢٠١٧ - ٢٠١٨ لە خوولی یانە پاڵەوانەکان بەژداری ١٠ یاری کردووە و توانیویەتی گۆڵێک تۆماربکات. سەرەڕای ئەوەی لە وەرزی ٢٠١٩ - ٢٠٢٠ تووشی پێکان هات لەم وەرزەدا، بەژداری ١٨ یاری یانەکەی کرد. لە وەرزی ٢٠٢٠ - ٢٠٢١ وەکوو یاریزانێکی سەرەکی یاری کردووە و تووشی پێکان هاتووە. لە مانگی ٦ـی ٢٠٢١ گرێبەستەکەی تاوەکو ساڵی ٢٠٢٤ درێژ کردۆتەوە.
مێژووی یاریکردن لەگەڵ هەڵبژاردە
ڤازکێز بەژداری هیچ چالاکییەکی هەڵبژاردەکەی نەکردووە لە تەمەنی منداڵیدا. لە جامی یۆرۆی ٢٠١٦ و جامی جیهانی ٢٠١٨ وەکوو یەکێک لە ٢٣ یاریزانە سەرەکییەکەی هەڵبژاردەکەی دەستنیشان کراوە و لە هەندێک یاریدا وەکوو یاریزانێکی سەرەکی یاری کردووە.
ژیانی تایبەتی
لە ساڵی ٢٠١٧ ڤازکێز لەگەڵ هاوڕێ کچەکەی بە ناوی ماکەرێنا ڕۆدریگێز ژیانی هاوسەرییان پێکهێنا و خاوەنی کوڕێکن. شایەنی باسە ڤازکێز لە یەک خوولەکدا ٧ یۆرۆ پەیدا دەکات کە لە ساڵەکەدا دەکاتە نزیکەی ٣،٦٠٠،٠٠٠ یۆرۆ.
