ناوه‌ڕۆك
کۆرپەلەی کوردستان
شاعیر: کامەران موکری
بەرهەم: ئاگر و ژیلە
هۆنراوە: کۆرپەلەی کوردستان
ئەی کچە نەشمیلانەکەم
کۆرپەلە خنجیلانەکەم
فرمێسکم کرد بە ملوانکەت
پەڕەی دڵیشم بە لانکەت
لە تیشکی گزنگی زێڕین
بۆم کردی ئەگریجەی چین چین
لە پەڕەی گوڵاڵەی ناسک
گۆنام بۆ کردی و تکەتک
شەونمی دەمم پیاڕژان
ئەی کۆرپەلەی نازدار و جوان
تۆش، کە گەورە بووی، بووی بە ژن
ببە، بە شانازی بۆ، من
ئەگەر، بۆ کورد و نیشتمان
تۆ، هەوڵ بدەیت بێ وچان
ئەگەر وەکوو مۆمی کافوور
ئەی جوانکیلەی گەردن بلوور
بتوێتەوە، بۆ گەل، وڵات
ببی بە ئاگری خەبات
ئەوسا کە لێت ئەبم ڕازی
بۆ کورد ئەبی بە شانازی
من دایکی تۆم بەڵام گیانە
ئەم وڵاتی کوردستانە
تۆی پەروەردە کرد بە جوانی
تۆش، سا، ببە بە قوربانی
بەبۆنەی ڕۆژی دایک و مناڵە، لە سەر زمانی دایک وتراوە
سەرچاوەکان
239 بینین
