ناوه‌ڕۆك
ناساندن و ژیاننامەی
شیلان دارا (بە عەرەبی: شيلان دارا، بە ئینگلیزی: Shelan Dara) خانمە چالاکوان و دەرمانسازێکی کوردی دانیشتووی شاری بەغدادی پایتەختی عێراق بوو، بە ڕەچەڵەک لە نەتەوەی کورد بووە و خەڵکی سلێمانی بووە، لە ساڵی ٢٠١٦ پزیشکی دەرمانسازی خوێندووە لە زانکۆی بەغداد بڕوانامەی بەکالۆریۆسی لە دەرمانسازی بەدەست هێناوە و لە بەغداد لە شاری پزیشکان وەک دەرمانساز کاری کردووە.
شیلان لەگەڵ دایک و باوکی دانیشتووی گەڕەکی مەنسووڕ بوونە نزیک باڵوێزخانەی ڕووسیا لە بەغداد کە گەڕەکێکی پێشکەوتووی شارەکەیە و بە گەڕەکی دەوڵەمەندەکان ناسراوە، شیلان کچە تاقانەی دایک و باوکی بووە. خێزانەکە لە ساڵی ١٩٦٨ـەوە دانیشتووی شاری بەغداد بوونە و ڕەچەڵکیان دەگەڕێتەوە بۆ شاری کۆیە و سلێمانی. چەند جارێک بڕیاری گەڕانەوەیان بۆ کوردستان دابوو بەڵام باوکی شیلان تووشی شێرپەنجە ببوو، بۆیە خێزانەکە هەر لە بەغدا مابوونەوە.
لە ڕووداوەکان و خۆپیشاندانەکانی تشرینی ساڵی ٢٠١٩ لە عێراق، شیلان وەکوو چارەسەرخوازی خۆبەخش چەجد جارێک لەگەڵ خۆپیشاندەرەکان بەشداری کردووە و چارەسەری خۆپیشاندانە بریندارەکانی کردووە. لە ساڵی ٢٠٢٠ شیلان لەگەڵ دایک و باوکی بە دڕندانەترین شێوە لە ڕووداوێکی نامۆ و تەمومژاویدا کوژران و ڕووداوەکە کاردانەوەی زۆری بەدوای خۆیدا هێنا.
زانیاری گشتی
| ناو | شیلان دارا ڕەئووف |
| پیشە | پزیشکی دەرمانساز، چالاکوان |
| نەتەوە | کورد |
| شوێنی نیشتەجێبوون | گەڕەکی مەنسوڕ، بەغداد، عێراق |
| کۆچی دوایی | ١٥ـی ئەیلوولی ساڵی ١٢٠٢٠ |
| هۆکاری مردن | کوشتن |
ڕووداوی کوشتنی شیلان و خێزانەکەی
ڕووداوی کوشتنی شیلان دارا و بنەماڵەکەی لە ئێوارەی ١٥ـی ئەیلوولی ساڵی ٢٠٢٠ ڕوویدا، لە میدیاکان بڵاوکرایەوە کە دەرمانسازێکی کوردی عێراقی بە ناوی شیلان دارا ڕەئوف لەگەڵ دایک و باوکی لە ماڵەکەی خۆیان لە گەڕەکی مەنسووڕ لە ڕۆژاوای بەغدادی پایتەخت بە دڕندانەترین شێوە کوژراون و درانەتە بەرچەقۆ و سەربڕاون.
کاردانەوەی سەر ڕووداوەکە و دەستگیرکردنی تاوانبار
له ١٩ـی ئەیلوولی ساڵی ٢٠٢٠، هێزە ئەمنییەکانی ئاساییش لە شاری هەولێر دەستگیرکردنی تاوانبارێکیان بە ناوی "مەهدی حسێن ناسڕ" ڕاگەیاند کە ویستبووی لە سنووری هەولێرەوە بچێتە وڵاتی تورکیا و لە ئوتێلێک خۆی حەشاردابوو، تاوانبارەکە ڕادەستی شاری بەغداد کرایەوە.
تاوانبار وەک ئەفسەری پاراستن لە وەزارەتی ناوخۆ لە باڵیۆزخانەی ڕووسیا لە بەغدا کاری کردووە، دوای دەستگیرکردنی دانی بە تاوانەکەی ناوە و ڕایگەیاند کە ئەو خێزانی شیلانی ناسیوە چاودێری کردوون و بە مەبەستی داواکردنی قەرز چووەتە ماڵیان، بەڵام باوکی شیلان داواکەی ڕەتکردووەتەوە بۆیە ئەویش تووڕە بووە و سەرەتا باوکەکەی کووشتووە دواتر کە دایکەکە هاتووەتەوە ئەویشی کووشتووە و پاشان شیلان، ڕووداوەکەی بە دڕندانەترین شێوە ئەنجام داوە و قوربانییەکانی سەری بڕی بوو، پاشان بڕی ١٠ هەزار دۆلاری ئەمریکی لە ماڵەکە دزی بوو و بەرەو شاری هەولێر هەڵهاتووە.
دانپێدانانی تاوانبارەکە بڵاوکرایەوە و ڕاستەوخۆ دانی بە تاوانەکەی نا، دادگای کەرخ لە بەغداد سێ جار بڕیاری لەسێدارەدانی بۆ تاوانبارەکە دەرکرد. بەشێک لە چاودێران و چالاکوانان بۆچوونێکی تریان هەبوو لەسەر ڕووداوەکە، پێیان وابوو کە ئەم ڕووداوە دروست کراوە و لایەنی باڵای دەستڕۆیشتوو لەپشت ڕووداوی کووشتنەکە هەبووە، چونکە شیلان چالاکوانی خۆپیشاندانەکانی تشرین بووە و لەو ماوەیە لە عێراق زۆرێک لە چالاکوان و بەشداربووانی ئەو خۆپیشاندانە یان دەکوژران یان دەڕفێندران، بۆیە واگریمانە کرا کە ئەم ڕووداوە تەنها وەکوو تۆڵەسەندنەوە بووە لە شیلان چونکە خۆبەخش و چالاکوانی نێو خۆپیشاندانەکانی ساڵی ٢٠١٩ـی بەغداد و عێراق بووە.
بەڵام کەسوکاری نزیکی شیلان ئەو دەنگۆیانەیان ڕەت کردەوە و بڵاویان کردەوە کە شیلان تەنها چەند جارێک وەکوو کارێکی مرۆڤایەتی بۆ چارەسەری بریندارەکان چووەتە گۆڕەپانی تەحریر لە بەغداد، کەسە نزیکەکانی دەیانزانی کە تاوانبار لە نزیک ماڵەکەیان ئەفسەری پشکنین بووە و کەسێکی ئالوودەی مەی بووە و چاودێری ماڵەکەی کردوون و چەند جارێک داوای قەرزی لە دارای باوکی شیلان کردووە بەڵام ڕەتیکردووەتەوە.
